სსიპ - ფერდინანდ თავაძის მეტალურგიისა და მასალათმცოდნეობის ინსტიტუტი
LEPL - FERDINAND TAVADZE METALLURGY AND MATERIALS SCIENCE INSTITUTE
ზესტაფონის ფეროშენადნობთა ქარხნის 85 წლის იუბილე

2018 წლის 26 ოქტომბერს ზესტაფონის ფეროშენადნობთა ქარხანამ საზეიმო ვითარებაში აღნიშნა ქარხნის დაფუძნების 85 წელი და დიდი მამულიშვილის გიორგი ნიკოლაძის დაბადებიდან 130 წლის იუბილე. გ. ნიკოლაძის სახელთანაა დაკავშირებული ჭიათურის მადნებიდან ფეროშენადნობების მიღების ტექნოლოგიის დამუშავება, რამაც დასაბამი მისცა საქართველოს ინდუსტრიულ განვითარებას.
საზეიმო ღონისძიება გიორგი ნიკოლაძის მონუმენტურ გორელიეფთან დაიწყო. მიტინგი გახსნა ქარხნის დირექტორმა ვასილ გველესიანმა, რომელმაც საზოგადოებას აუწყა იმ გეგმების შესახებ, რაც ქარხნის კიდევ უფრო წარმატებულ საქმიანობას შეუწყობს ხელს და აღწერა ის პროექტიც, რომლის თანახმად უახლოეს პერიოდში გიორგი ნიკოლაძის ძეგლის მიმდებარე ტერიტორია ზესტაფონელთა დასასვენებელ სკვერად გადაიქცევა. წარმოდგენილი იქნა პროექტის ცალკეული ფრაგმენტები.
განწყობილება ჭეშმარიტად საზეიმო იყო. მიტინგს ესწრებოდნენ ქარხნის მუშა-მოსამსახურეები, ზესტაფონის მუნიციპალიტეტის ხელმძღვანელობა, ზესტაფონის მაჟორიტარი დეპუტატი შალვა კიკნაველიძე, მარგვეთისა და უბისის ეპარქიის სამღვდელოება და სტუმრები: ჯიხაიშში ნიკოლაძის მუზეუმის თანამშრომლები, საქართველოს ტექნიკური უნივერსიტეტის პროფესორები, ფერდინანდ თავაძის მეტალურგიისა და მასალათმცოდნეობის ინსტიტუტის წარმომადგენლები, რომლებიც გიორგი ნიკოლაძის ყველა საიუბილეო თარიღში მონაწილეობდნენ.
მიტინგის შემდეგ საზოგადოებამ კულტურის სახლში გადაინაცვლა, სადაც გამომსვლელებმა ისაუბრეს ქარხნის ისტორიულ მისიაზე საქართველოში მრეწველობის განვითრების კუთხით და პერსპექტიულ გეგმებზე.
გიორგი ნიკოლაძის საქვეყნოდ ცნობილ მიღწევებზე საინჟინრო საქმეში, მათემატიკაში, სპორტსა და ლექსიკოგრაფიაში ისაუბრეს პროფესორმა გურამ ქაშაკაშვილმა და აკადემიკოსმა გიორგი თავაძემ.
საზოგადოებას ეს დღესასწაული მიულოცეს ზესტაფონის მაჟორიტარმა დეპუტატმა შალვა კიკნაველიძემ და ქალაქის მერმა კახაბერ მახათაძემ.
ყოველივე ეს მიმდინარეობდა ზესტაფონის მუნიციპალიტეტის მერიასთან არსებული კულტურისა და შემოქმედების ცენტრის ძალებით გამართული მშვენიერი კონცერტის ფონზე, რამაც კიდევ უფრო აამაღლა დამსწრე საზოგადოების სადღესასწაულო განწყობილება.

27-10-2018    ნანახია: 174-ჯერ