ფერდინანდ თავაძის მეტალურგიისა და მასალათმცოდნეობის ინსტიტუტი ღრმა მწუხარებით იუწყება, რომ 93 წლის ასაკში გარდაიცვალა ცნობილი მეცნიერი და ღვაწლმოსილი ინჟინერი, საქართველოს სახელმწიფო პრემიის ლაურეატი ანზორ გაბისიანი.   

    ანზორ გაბისიანმა 1950 წელს  წარჩინებით  დაამთავრა  თბილისის მე-7 ვაჟთა საშუალო სკოლა და სწავლა განაგრძო მოსკოვის ფოლადისა და შენადნობების ინსტიტუტში. ინსტიტუტის დამთავრების შემდეგ ინჟინერ-მეტალურგის კვალიფიკაციით იგი სამშობლოში დაბრუნდა და რუსთავის ახლად ფეხადგმული მეტალურგიული ქარხანის მარტენის საამქროში დაიწყო მუშაობა. 1959-1961 წწ საქართველოს მეცნიერებათა აკადემიის მეტალურგიის ინსტიტუტის ასპირანტურაში სწავლობდა,  საკანდიდატო დისერტაციაც იქვე დაიცვა და  ტექნიკის მეცნიერებათა კანდიდატის რანგში მუშაობა დაიწყო ინსტიტუტის თხევადი ლითონებისა და წიდების ფიზიკურ-ქიმიური კვლევის ლაბორატორიაში, რომელსაც მოგვიანებით, 1974 წლიდან  თავად  ჩაუგდა სათავეში.

    ბატონი ანზორი ხანგრძლივი მოღვაწეობის მთელ პერიოდში მრავალი საინტერესო გადაწყვეტილების ინიციატორი იყო. მათგან ერთ-ერთი, რომელსაც უდიდესი რეზონანსი ჰქონდა მეტალურგიულ საზოგადოებაში, თხევადი ფოლადის ღუმელგარეშე დამუშავება გახლდათ. 1983 წელს კოლეგებთან ერთად მან დაამუშავა ციცხვის შიბერული საკეტის ჩამოსასხმელი ღარიდან თხევადი ფოლადის ინერტული აირებით, წიდაწარმომქმნელი ნარევებითა და ფხვნილოვანი მასალებით შებერვის ე.წ. ინჟექციური მეთოდი.

    საბჭოთა კავშირის შავი მეტალურგიის მინისტრის ბრძანებით ზემოაღნიშნული ტექნოლოგია დაინერგა ყოფილი საბჭოთა კავშირის მეტალურგიულ საწარმოებში მნიშვნელოვანი ეკონომიური ეფექტით. ძნელად თუ მოიძებნება მაგალითი, რომ საკავშირო მინისტრის ბრძანებით ყველა მეტალურგიულ ქარხანაში დანერგილიყოს მეტალურგიის ინსტიტუტის და რუსთავის მეტალურგიული ქარხნის მიერ შემუშავებული ეს ტექნოლოგია,  რომელიც  შემდეგ  „რუსთავის მეთოდის“ სახელით გავრცელდა მსოფლიოში.

    ამ სამუშაოს შედეგები გამოქვეყნდა შვედეთში და შეერთებულ შტატებში ჩატარებულ მეფოლადეთა საერთაშორისო კონგრესების შრომებში და სულ მალე, 1987 წელს  მეტალურგიაში "მოდის კანონმდებელმა" დასავლეთ გერმანულმა ფირმამ  ”კრუპ პოლიზიუსმა”, შეიძინა ლიცენზია აღნიშნულ ტექნოლოგიურ მეთოდზე, ხოლო 1988 წელს ბატონ ანზორს კოლეგებთან ერთად მიენიჭა საქართველოს სახელმწიფო პრემია მეცნიერებისა და ტექნიკის დარგში.

    აქვე მკითხველს შევახსენებთ, რომ მეტალურგიის ინსტიტუტი გამორჩეული მეცნიერული დაწესებულება გახლდათ მთელ საბჭოთა კავშირში, რისი ერთ-ერთი დადასტურებაა 1986 წელს საბჭოთა კავშირის მეცნიერებათა აკადემიის გარდამავალი დროშით დაჯილდოვება.   ცხადია, რომ ეს მიღწევები ინსტიტუტის თანამშრომელთა მუხლჩაუხრელი შრომის შედეგია, რაშიც ბატონ ანზორს ლომის წილი აქვს შეტანილი.

    ანზორ გაბისიანი გახლდათ ეროვნული ენერგიით დამუხტული, რაინდული თვისებებით შემკული, უაღრესად აზრიანი სათნო პიროვნება და უღალატო მეგობარი. ინსტიტუტი ამ მოსაგონარით ემშვიდობება ბატონ ანზორის ნათელ სულს.

                ფერდინანდ თავაძის მეტალურგიისა და

მასალათმცოდნეობის ინსტიტუტი