ფერდინანდ თავაძის მეტალურგიისა და მასალათმცოდნეობის ინსტიტუტი ღრმა მწუხარებით იუწყება, რომ 88 წლის ასაკში გარდაიცვალა ცნობილი მეცნიერ-მეტალურგი და ღვაწლმოსილი ინჟინერი, ტექ. მეცნ. აკად.დოქტორი, წამყვანი მეცნიერ თანამშრომელი ბორის მარგიევი.
1959-64 წწ ბორის მარგიევი სწავლობდა საქართველოს პოლიტექნიკური ინსტიტუტის მეტალურგიის ფაკულტეტზე, რომლის დამთავრების შემდეგ, 1961 წელს მუშაობა დაიწყო რუსთავის მეტალურგიული ქარხნის მარტენის საამქროში ჯერ მეფოლადის ხელშემწყობის, შემდეგ- ოსტატის და ბოლოს - ცვლის უფროსის თანამდებობაზე; 1965 წლიდან 2022 წლამდე იგი მუშაობდა საქართველოს მეცნიერებათა აკადემიის მეტალურგიის ინსტიტუტში სხვადასხვა სამეცნიერო თანამდებობაზე. ხანგრძლივი და ნაყოფიერი სამეცნიერო მოღვაწეობის პერიოდში მას მჭიდრო კავშირი ჰქონდა უკრაინისა და რუსეთის მეტალურგიული პროფილის სამეცნიერო და სამრეწველო ცენტრებთან. უკრაინის მეცნიერებათა აკადემიის საჩამოსხმო პრობლემების ინსტიტუტში 1975 წელს წარმატებით დაიცვა დისერტაცია ტექნიკის მეცნიერებათა კანდიდატის სამეცნიერო ხარისხის მოსაპოვებლად. მისი სამეცნიერო მოღვაწეობა ძირითადად ეხებოდა ფოლადების კომპლექსური განმჟანგველებისა და მოდიფიკატორების მიღებისა და კვლევის საკითხებს, ხოლო ბოლო წლებში მის სამეცნიერო ინტერესებს წარმოადგენდა ნანოგანზომილების არალითონური მასალების მიღება და კვლევა და მათი გამოყენება ლითონური მასალების მოდიფიცირებისათვის მათი საექსპლუატაციო მახასიათებლების გაუმჯობესების მიზნით. თავისი კვლევის შედეგები მოხსენებული აქვს მრავალ საერთაშორისო სიმპოზიუმსა და კონფერენციაზე. ბ.მარგიევი თანაავტორია რეიტინგულ ჟურნალებსა და შრომათა კრებულებში გამოქვეყნებული 80-მდე სამეცნიერო ნაშრომის, 29 გამოგონების და 1 პატენტის.
ბორის მარგიევი იყო დიდი პიროვნება, ოჯახის, კოლეგების, მეგობრებისა და თავისი საქმის მოყვარული და ერთგული ადამიანი. იგი იყო სამართლიანი და კეთილსინდისიერი ურთიერთობებში, განსაკუთრებით ყურადღებიანი და მზრუნველი იყო ახალგაზრდა კოლეგების მიმართ. ინსტიტუტის კოლექტივი ღრმა მწუხარებით ემშვიდობება ერთგულ კოლეგას და სამძიმარს უცხადებს ოჯახს და ახლობლებს.
ფერდინანდ თავაძის მეტალურგიისა და
მასალათმცოდნეობის ინსტიტუტის თანამშრომლები