მასალები ვოლფრამის კარბიდის (WC) ფუძეზე, რომლებიც ხასიათდება მაღალი სისალითა და ცვეთამედეგობით, დიდი ხანია ფართოდ გამოიყენება საჭრელი და სამთო ინსტრუმენტების დასამზადებლად. ფუნქციონალური თვისებების შემდგომი გაუმჯობესების მიზნით, ხდება მათი ლეგირება ან მოდიფიცირება სხვადასხვა კერამიკული ფაზებით. ფერდინანდ თავაძის მეტალურგიისა და მასალათმცოდნეობის ინსტიტუტის (მმი) მკვლევართა ჯგუფმა მიიღო კერამიკული კვაზიევტექტიკით ბორის კარბიდი–ტიტანის დიბორიდი (B₄C–TiB₂) მოდიფიცირებული სალი ლითონკერამიკული შენადნობების – ვოლფრამის კარბიდი–კობალტი (WC–Co) და ვოლფრამის კარბიდი–ტიტანის კარბიდი–კობალტი (WC–TiC–Co) – ულტრადისპერსიული ფხვნილები, და, ასევე, მათი რთული ფორმის კომპაქტები. ამ მოდიფიკატორის უპირატესობებია მისი: (1) სისალე, რომელიც თითქმის ისეთივე მაღალია, როგორც სუფთა ბორის კარბიდისა, და (2) ელექტრული და სითბური გამტარობა, რომლებიც სიდიდის რამდენიმე რიგით უფრო მაღალია, რაც უზრუნველყოფს სწრაფ კომპაქტირებას და ამით ხელს უშლის დისპერსიულობის შემცირებას.

ამ კვლევის შედეგები ყოვლისმომცველად (50 გვერდზე) შეჯამდა ოთარ ცაგარეიშვილის, არჩილ მიქელაძის, როინ ჭედიას, თამაზ ბაციკაძისა და ლევან ჩხარტიშვილის სტატიაში, რომელიც გამოქვეყნდა ჟურნალში „უახლესი პროგრესი მასალებში“:

1. O. Tsagareishvili, A. Mikeladze, R. Chedia, T. Batsikadze, L. Chkhartishvili. Obtaining of WC–Co- and WC–TiC–Co-Based Ultradispersive Alloys Modified with B₄C–TiB₂ Quasieutetic. Rec. Prog. Mater., 2024, 6 (3), 21 (1-50).

https://doi.org/10.21926/rpm.2403021 

Paper _ Rec. Prog. Mater. 2024 6 (3) 21 (1-50).pdf

გადმოწერა / გახსნა - PDF

გამომცემლობამ LIDSEN Publishing Inc. (აშშ) ეს სტატია ჟურნალის შესაბამისი ნომრის წამყვან სტატიად მიიჩნია და მისი სათაური და მასში შემუშავებული მეთოდით დამზადებული ინსტრუმენტების ფოტო ამ ნომრის გარეკანზე გამოაქვეყნა. ეს ფაქტი ინსტიტუტში მიმდინარე სამეცნიერო-კვლევითი მუშაობის მნიშვნელოვნების, აქტუალურობისა და ეფექტურობის საერთაშორისო აღიარების კიდევ ერთ დადასტურებად უნდა ჩაითვალოს.