ფერდინანდ თავაძის მეტალურგიისა და მასალათმცოდნეობის ინსტიტუტი ღრმა მწუხარებით იუწყება, რომ 85 წლის ასაკში გარდაიცვალა ინსტიტუტის მთავარი მეცნიერ თანამშრომელი, საქართველოს ტექნიკური უნივერსისტეტის პროფესორი, საქართველოს საინჟინრო აკადემიის მეტალურგიისა და ქიმიური ტექნოლოგიების განყოფილების აკადემიკოს-მდივანი, ტექნიკის მეცნიერებათა დოქტორი ჯემალ შარაშენიძე.

 ჯემალი დაიბადა 1940 წელს სამტრედიაში, ცნობილი ექიმების ოჯახში. 1963 წელს საქართველოს პოლიტექნიკური ინსტიტუტის მეტალურგიის ფაკულტეტის წარჩინებით დამთავრების შემდეგ შრომოთი საქმიანობა დაიწყო მეტალურგიის ინსტიტუტში, სადაც გაიარა გზა ინჟინრის თანამდებობიდან მთავარ მეცნიერ თანამშრომლის თანამდებობამდე. 1969 წელს წარმატებით დაიცვა საკანდიდატო დისერტაცია მოსკოვის საკავშირო  მეტალურგიული მანქანათმშენებლობის საპროექტო და სამეცნიერო- კვლევით  ინსტიტუტში.

ახალგაზრდა მეცნიერი სამეცნიერო კვლევით მუშაობასთან ერთად ეწეოდა პედაგოგიურ მოღვაწეობას საქართველოს პოლიტექნიკურ ინსტიტუტში, ლითონების წნევით დამუშავების კათედრაზე. კითხულობდა ლექციების კურს ლითონთა წნევით დამუშავების ერთ-ერთ ურთულეს და საინტერესო საგანში - პლასტიკურობის თეორიაში. სსრკ უმაღლესი საატესტაციო კომისიის მიერ 1980 წელს მას მიენიჭა დოცენტის წოდება.

 ჯემალ შარაშენიძემ 1994 წელს წარმატებით დაიცვა სადოქტორო დისერტაცია, ხოლო 1998 წელს მიენიჭა პროფესორის წოდება. იგი არის ავტორი 100-ზე მეტი სამეცნიერო შრომისა და 5 გამოგონების. მონაწილეა მრავალი ადგილობრივი და საერთაშორისო კონფერენციების. მისი სამეცნიერო ინტერესების სფეროს შეადგენდა ლითონების ცხლად და ცივად გრძივი გლინვისას სორტული კალიბრების კვლევისა და ოპტიმიზაციის სფერო. მან შეისწავლა წვრილსორტული გლინვის დროს დეფორმაციისა და ძალოვანი პარამეტრების განაწილების კანონზომიერებანი, დაადგინა გლინების ცვეთის მექანიზმი  და გლინვის ოპტიმალური რეჟიმები, რაც გათვალისწინებულ იქნა წვრილსორტული საამქროს პროექტირების პროცესში.

2006 წლიდან სიცოცხლის ბოლომდე,  ბატონი ჯემალი პარალელურად მოღვაწეობდა საინჟინრო აკადემიაში. იგი იყო საქართველოს საინჟინრო აკადემიის  მეტალურგიისა და ქიმიური ტექნოლოგიების განყოფილების აკადემიკოს-მდივანი.

ჯემალ შარაშენიძის ხელმძღვანელობით დაცულია მრავალი საკანდიდატო და სადოქტორო დისერტაცია ლითონების წნევით დამუშავების სპეციალობით. წლების განმავლობაში  იყო ფერდინანდ თავაძის მეტალურგიისა და მასალათმცოდნეობის ინსტიტუტის სამეცნიერო საბჭოს წევრი და აქტიურად მონაწილეობდა მის მუშაობაში. იგი იყო ტექნიკური უნივერსიტეტის ქიმიის და მეტალურგიის ფაკულტეტის აკადემიური დოქტორის ხარისხის მიმნიჭებელი კოლეგიის წევრი, აქტიურად მონაწილეობდა დისერტაციების შეფასებაში და ხშირად იყო სადისერტაციო სამუშაოების რეცენზენტი. ახალგაზრდა თანამშრომლებს სიამოვნებით გადასცემდა ცოდნას და გამოცდილებას

ბატონი ჯემალი გახლდათ ეროვნული ენერგიით დამუხტული, რაინდული თვისებებითშემკული უაღრესად სათნო პიროვნება. მისი სახით ჩვენმა საზოგადოებამ დაკარგა გამორჩეული მეცნიერი და შესანიშნავი მოქალაქე, ჩვენმა მეტალურგიულმა სამეგობრომ კი უღალატო მეგობარი. კოლეგები და მეგობრები ამ მოსაგონარით   ემშვიდობებიან    ჯემალი შარაშენიძის სპეტაკ და ლამაზ სულს. 

ფერდინანდ თავაძის მეტალურგიისა და მასალათმცოდნეობის ინსტიტუტის თანამშრომლები