სსიპ ფერდინანდ თავაძის მეტალურგიისა და მასალათმცო­დნეობის ინსტიტუტი ღრმა მწუხარებით იუწყება, რომ 98 წლის ასაკში გარდაიცვალა ინსტიტუტის მთავარი მეცნიერ თანამშრო­მელი, ტექნ.მეცნ.აკად.დოქტორი, იოსებ (სოსო) ცინცაძე.

ბატონი სოსო 1947 - 1952 წწ.  სწავლობდა საქართველოს პოლიტექნიკური ინსტიტუტის (სპი) მექანიკა-მანქანათმშენე­ბლობის  ფაკულტეტზე. იგი ადრიდანვე ჩაერთო შრომით საქმიანობაში საინჟინრო-ტექნიკური პერსონალის ამპლუაში და პარალელურად აქტიურად მონაწილეობდა სპი-ის ლითონთა ტექნოლოგიის კათედრის სასწავლო პროცესში: ახლად დაფუძნებული მეტალურგიის ფაკულტეტის სტუდენტებს ლითონმცოდნეობის ანაბანას ასწავლიდა.

წლების მანძილზე ბატონი სოსო კითხულობდა ლექციებს  ლითონმცოდნეობის, ლითონთა ტექნოლოგიის და ლითონური ნაკეთობების ექსპერტიზისა და დიაგნოსტიკის დარგში (1958-2006 წწ); შედეგად იგი ჩამოყალიბდა უმაღლესი რანგის ექსპერტად, მან, როგორც ლითონმცოდნე ექსპერტმა, დიდი სამსახური გაუწია საქართველოს სამრეწველო ინფრასტრუქტურას და საქართველოს  იუსტიციის სამინისტროს სასამართლო ექსპერტიზის ცენტრს, სადაც მიწვეული იყო ლითონების და ლითონის ნაკეთობების შტატგარეშე სასამართლო ექსპერტად (1970-1990 წწ).

ბატონი სოსო გახლდათ ყოველმხრივ გამორჩეული პიროვნება - განგებამ გარეგნულ სრულყოფილებასთან ერთად მამის, ცნობილი ქიმიკოსის შალვა ცინცაძის და ბიძის ქართველ მათემატიკოსთა პატრიარქის, ანდრია რაზმაძის გონიერებაც დაანათლა. მიუხედავად ჯოჯოხეთური წარსულისა, როცა 1937 წლის სისხლიანმა რეპრესიებმა მისი ოჯახი შეიწირა, ბატონი სოსო არასდროს გაბოროტებულა, თუმცა არც დაოჯახებაზე უფიქრია და ღვთისგან ბოძებული მოზღვავებული ადამიანური სითბო უშურველად და ლაზათიანად მოახმარა ქვეყანას, ახლობლებსა  და კოლეგებს, იღვაწა უხმაუროდ, იფუსფუსა სიყვარულით და  შექმნა სოსო ცინცაძის სახელით ცნობილი ლეგენდა-ფენომენი.

ბატონი სოსოს შრომითი საქმიანობის ფართო დიაპაზონის ფონზე, მისი ხანგრძლივი ცხოვრების ყველაზე ნაყოფიერი წლები მეტალურგიისა და მასალათმცოდნეობის ინსტიტუტს უკავშირდება, რომელთანაც კავშირი არასოდეს გაუწყვეტია, ინსტიტუტი იყო მისთვის ჭეშმარიტად მშობლიური კერა.

ბატონი სოსო ცინცაძის სახით ჩვენმა საზოგადოებამ დაკარგა გამორჩეული სწავლული და შესანიშნავი მოქალაქე, ხოლო ინსტიტუტმა ერთგული მეგობარი და ბრძენი მოძღვარი.