ფერდინანდ თავაძის მეტალურგიისა და მასალათმცოდნეობის ინსტიტუტი ღრმა მწუხარებით იუწყება, რომ 73 წლის ასაკში მოულოდნელად გარდაიცვალა ინსტიტუტის ლაბორატორიის უფროსი, ცნობილი მეცნიერი და ღვაწლმოსილი ინჟინერი, ტექნიკურ მეცნიერებათა აკადემიური დოქტორი აკაკი ფეიქრიშვილი.
აკაკი ფეიქრიშვილმა 1975 წ დაამთავრა საქართველოს პოლიტექნიკური ინსტიტუტის მეტალურგიის ფაკულტეტი ინჟინერ-მეტალურგის კვალიფიკაციით და მუშაობა დაიწყო გ. წულუკიძის სამთო მექანიკის ინსტიტუტში, აფეთქების ენერგიის მართვის ლაბორატორიაში. აქ გაიწაფა იგი აფეთქების ფიზიკის ნიუანსებში და გამოიყენა აფეთქების ენერგია უნიკალური თვისებების მქონე არაორგანული მასალების მისაღებად. აქ ჩამოყალიბდა იგი მაღალ მოთხოვნად სპეციალისტად, რომლის ინტერესებშიც გაერთიანდა აფეთქების პროცესითა და თვითგავრცელებადი მაღალტემპერატურული სინთეზის ტექნოლოგიებით სპეციალური თვისებების მქონე სრულიად ახალი მასალების მიღება. აქ უპირველეს ყოვლისა იგულისხმება კომპოზიციური მასალები, მათ შორის ნანოსტრუქტურულ მდგომარეობაში, კერამიკული სალი და რადიაციამედეგი შენადნობები.
1976 წ აკაკი ფეიქრიშვილმა გაიარა სტაჟირება საბჭოთა კავშირის მეცნიერებათა აკადემიის ციმბირის განყოფილების ჰიდროდინამიკის ინსტიტუტში მეტალოგრაფიაში, რენტგენოგრაფიასა და ელექტრონულ მიკროსკოპიაში; 1984 და 1989 წ ჰელსინკისა და ტამპერეს (ფინეთი) ტექნოლოგიურ უნივერსიტეტებში აითვისა თვითშეზეთვადი ტრიბოლოგიური მასალებისა და იონური და პლაზმური დანაფარების მიღების ტექნოლოგიები; 1992 - 1993 წ.წ -კარლსრუეს (გერმანია), ბირთვული კვლევების სამეცნიერო ცენტრში, სწავლობდა მაღალტემპერატურული კერამიკული ზეგამტარების მიღების ტექნოლოგიას; 1997 წ. - „SCINTAG” Ltd, (კუპერტინო, კალიფორნია, აშშ,) გადიოდა სტაჟირებას პროგრამული რენდგენოსტრუქტურული ანალიზის მეთოდების ათვისების მიზნით. ამ საქმიანობის შედეგად აკაკი ფეიქრიშვილმა შეიძინა მსოფლიოს წამყვან უნივერსიტეტებთან და სამეცნიერო ცენტრებთან თანამშრომლობის დიდი გამოცდილება. იგი წარმატებით თანამშრომლობდა აშშ-ს სამხედრო საზღვაო ძალების დეპარტამენტთან (2007 - 2010წწ), დიდი ბრიტანეთის საზღვაო ძალების გლობალური კვლევების ოფისთან (ლონდონი, 2007 - 2009წწ), აშშ-ს ბროქჰევენის ნაციონალურ ლაბორატორიასთან (2010 - 2015წწ), ქ.კანზასის (აშშ) ქარხანასთან (2010 - 2015წწ), ხოლო აშშ-ს არმიის ცენტრალურ საკვლევ ლაბორატორიასა (მერილენდი) და აშშ-ს ლოურენს ლივერმორის ნაციონალურ ლაბორატორიასთან 2000 წელს დაწყებული თანამშრომლობა დღემდე გრძელდება. ამ საქმიანი ურთიერთობის შედეგები გამოქვეყნებულია არა ერთი ერთობლივი მეცნიერული სტატიის სახით მსოფლიოს წამყვან მეცნიერულ ჟურნალებში და მოხსენებულია პრესტიჟულ საერთაშორისო ფორუმებზე.
იგი ავტორია ექვსი გამოგონებისა და მაღალრეიტინგულ ჟურნალებში გამოქვეყნებული 120 სტატიისა, რომლებმაც განსაზღვრეს ბატონი აკაკის მაღალი ცნობადობის მაჩვენებელი (Scopus citation – 145, H-6). სტატიების დიდი უმრავლესობა საერთაშორისო თანამშრომლობის ფარგლებშია შესრულებული. ამ სფეროში მის მიერ მიღებული შედეგები შორს გაცდა ჩვენი ქვეყნის ფარგლებს და საერთაშორისო თანამეგობრობის მეცნიერული მიღწევათა საგანძურში დაიმკვიდრა სათანადო ადგილი.
ბატონმა აკაკიმ დიდი როლი შეასრულა პოსტსაბჭოთა საქართველოს მეცნიერული კვლევების ორგანიზებაში. 2000-2018 წლებში იგი იყო დასავლეთის მიერ დაფინანსებული უკრაინის მეცნიერებისა და ტექნოლოგიების ცენტრის (STCU ) საქართველოს ოფისის ხელმძღვანელი. მისი უშუალო კორდინაციითა და ხელმძღვანელობით განხორციელდა 200-მდე პროექტი. ბატონი აკაკის ამ მეტად საპასუხისმგებლო პოსტზე არჩევა განაპირობა მისმა ღრმა განსწავლულობამ მასალათმცოდნეობის სფეროში.
ბატონ აკაკის იმთავითვე მჭიდრო მეცნიერული კავშირები ჰქონდა მეტალურგიის ინსტიტუტთან. აქ დაიცვა მან 1981 წელს საკანდიდატო დისერტაცია, რომლის ხელმძღვანელი გახლდათ ინსტიტუტის დირექტორი აკად. ფერდინანდ თავაძე. ეს თანამშრომლობა შემდეგში კიდევ უფრო გაღრმავდა, ხოლო 2016 წლიდან იგი მეტალურგიის ინსტიტუტის ლაბორატორიის ხელმძღვანელია. ამავე წლიდან დაიწყო ნანოკრისტალური მაღალტექნოლოგიური შავი ნახშირბადის მიღება ნარჩენი ამორტიზირებული საბურავებიდან მაღალტემპერატურული პიროლიზის მეთოდით. საერთაშორისო პროექტის (STCU-P774a) ფარგლებში ინსტიტუტში დამონტაჟდა ბატონი აკაკის კონსტრუქციის სამი მაღალტემპერატურული პიროლიზის დანადგარი. კონსტრუქცია დაპანტეტებულია ბატონი აკაკის და დამფინანსებელი კომპანიის (G3ct) თანაავტორობით აშშ-ში, კანადასა და ინდოეთში. კვლევები ამ მიმართულებით დღესაც გრძელდება.
ბატონი აკაკი გახლდათ შესანიშნავი გარეგნობის მაღალი, ახოვანი აღნაგობის ვაჟკაცი, უაღრესად კომუნიკაბელური, კეთილმოსურნე პიროვნება და ასეთად დარჩება მისი კოლეგების მეხსიერებაში. მისი სახით ჩვენმა საზოგადოებამ დაკარგა გამორჩეული მეცნიერი და შესანიშნავი მოქალაქე, მისმა ოჯახმა - ბრძენი წინამძღოლი, მოსიყვარულე მეუღლე, მამა და ბაბუა, ხოლო ჩვენ – ერთგული კოლეგა და მეგობარი.
ფერდინანდ თავაძის მეტალურგიისა და მასალათმცოდნეობის ინსტიტუტის თანამშრომლები