სსიპ - ფერდინანდ თავაძის მეტალურგიისა და მასალათმცოდნეობის ინსტიტუტი
LEPL - FERDINAND TAVADZE METALLURGY AND MATERIALS SCIENCE INSTITUTE
ზურაბ მირიჯანაშვილის გამოსათხოვარი

ფერდინანდ თავაძის მეტალურგიისა და მასალათმცოდნეობის ინსტიტუტი ღრმა მწუხარებით იუწყება, რომ 85 წლის ასაკში გარდაიცვალა ინსტიტუტის მთავარი მკვლევარი სპეციალისტი, ტექნიკის მეცნიერებათა დოქტორი ზურაბ მირიჯანაშვილი.


1958 - 1963 წწ. ზურაბ მირიჯანაშვილი სწავლობდა  საქართველოს პოლიტექნიკური ინსტიტუტის, მეტალურგიის ფაკულტეტზე, რომლის დამთავრების შემდეგ 1963 – 66 წლებში მუშაობა  დაიწყო ქ.თბილისის საავიაციო ქარხანის ჩამოსხმის საამქროში ინჟინერ-ტექნოლოგად, შემდეგ 1966-69 წლებში „საქმთავარენერგოში“ ინჟინერ-ლითონმცოდნის თანამდებობაზე, ხოლო 1969 წლიდან გარდაცვალებამდე  იგი  სსიპ ფერდინანდ თავაძის მეტალურგიისა და მასალათმცოდნეობის ინსტიტუტის თანამშრომელია. იგი აქვე სწავლობდა  ასპირანტურაში და აქვე დაიცვა დისერტაცია ტექნიკის აკადემიური დოქტორის სამეცნიერო ხარისხის მოსაპოვებლად. წლების განმავლობაში იყო ინსტიტუტის ფხვნილოვანი კომპოზიციური მასალებისა და დანაფარების ლაბორატორიის უფროსი. მის ძირითად  სამეცნიერო ინტერესებს წარმოადგენდა  აიროვანი ქლორის ზემოქმედებით ლითონშემცველი წარმოების ნარჩენებიდან  ფართო სპექტრის ლითონური ქლორიდების მიღების ტექნოლოგიური პროცესების  დამუშავება, რომლებიც ფართოდ გამოიყენებოდა ფხვნილოვანი ლითონების, მათი შენადნობების, ნაერთებისა და დისპერსიულად განმტკიცებული კომპოზიციური მასალების მისაღებად.

ბატონი ზურაბი დიდ ყურადღებას უთმობდა სამეცნიერო შედეგების პრაქტიკაში რეალიზების საკითხებს. მისი ხელმძღვანელობით შესრულებულია სახელშეკრულებლო სამუშაოები როგორც საქართველოში (რუსთავის მეტალურგიულ კომბინატში, რუსთავის ქარხანა “აზოტი”-ში), ასევე საზღვარგარეთ, ყოფილი საბჭოთა კავშირის რესპუბლიკებში (ქარხანა Донниичермет»-ში, ნიკოპოლის ფეროშენადნობის ქარხანაში, სამეცნიერო-სამრეწველო გაერთიანება «Тулачермет»-ში, ქარხანა «Сибэлектросталь»-ში); ეს სამუშაოები ითვალისწინებდა ახალი ტიპის კაზმებისა და შესაბამისად ახალი მასალების მიღების ტექნოლოგიური რეგლამენტების დამუშავებას  და საცდელ-სამრეწველო პარტიების მიღებას.

წლების განმავლობაში იგი იყო ფერდინანდ თავაძის მეტალურგიისა და მასალათმცოდნეობის ინსტიტუტის სამეცნიერო საბჭოს წევრი და აქტიურად მონაწილეობდა მის საქმიანობაში. ახალგაზრდა თანამშრომლებს სიამოვნებით გადასცემდა ცოდნას და გამოცდილებას.

ბატონი ზურაბი არის ავტორი 100-მდე სამეცნიერო ნაშრომისა და 7 გამოგონების. იგი მონაწილეობდა მრავალი ადგილობრივი და საერთაშორისო კონფერენციების მუშაობაში. მისი სამეცნიერო საქმიანობა შეფასებულია სხვადასხვა საპატიო წოდებით და ჯილდოთი. მას მინიჭებული აქვს საქართველოს რესპუბლიკის დამსახურებული გამომგონებლის წოდება.

ზურაბ მირიჯანაშვილი იყო ოჯახის, კოლეგების, მეგობრებისა და თავისი საქმის მოყვარული დიდი პიროვნება. იგი იყო სამართლიანი და კეთილსინდისიერი ურთიერთობებში.

ინსტიტუტის კოლექტივი დიდი მწუხარებით ემშვიდობება ერთგულ კოლეგას და სამძიმარს უცხადებს ოჯახს და ახლობლებს. 

 

                                                                                 ფერდინანდ თავაძის მეტალურგიისა და    

 მასალათმცოდნეობის ინსტიტუტის თანამშრომლები

14-11-2026    ნანახია: 1-ჯერ